പേരാമ്പ്ര: ചെറുവണ്ണൂര്‍ പഞ്ചായത്തിലെ പ്രധാന റോഡുകളിലൊന്നായ ആവള - പന്നിമുക്ക് റോഡ് ഗതാഗതയോഗ്യമാക്കണമെന്ന് ആവശ്യപ്പെട്ട് കുട്ടോത്ത് ശാഖ മുസ്ലിം ലീഗ് പന്നി മുക്കില്‍ സായാഹ്ന ധര്‍ണ്ണ സംഘടിപ്പിച്ചു.
ചെറുവണ്ണൂര്‍ പഞ്ചായത്തിലെ പ്രധാന റോഡുകളിലൊന്നാണ് ആവള - പന്നിമുക്ക് റോഡ്. ഈ റോഡിലൂടെയുള്ള യാത്ര മാസങ്ങളായി ദുര്‍ഘടകരമാണ്. വേളം പഞ്ചായത്തുമായി ബന്ധിപ്പിക്കുന്ന ഈ റോഡിലൂടെ ദിവസവും നൂറുക്കണക്കിന് വാഹനങ്ങളും ആവള ഗവണ്മെന്റ് ഹയര്‍ സെക്കണ്ടറി സ്‌കൂള്‍ വിദ്യാര്‍ത്ഥികളടക്കം ആയിരക്കണക്കിന് ആളുകളും ദിവസേന യാത്ര ചെയ്യുന്നുണ്ട്.
കുണ്ടും കഴിയും വെള്ളക്കെട്ടും കാരണം നിരവധി ഇരുചക്രവാഹനങ്ങളടക്കം അപകടത്തില്‍ പെടുന്നത് നിത്യസംഭവമാണ്.
ലോക്‌സഭാ തെരഞ്ഞെടുപ്പ് കാലം മുതല്‍ റോഡ് പണി കരാര്‍ കൊടുത്തിരിക്കുന്നു എന്ന് പറഞ്ഞ് ജനങ്ങളെ കബളിപ്പികുയാണെന്നും കരാറുകാരുടെയും അധികാരികളുടെയും ഒത്തുകളി അവസാനിപ്പിച്ച് എത്രയും വേഗം റോഡിന്റെ പണി ആരംഭിക്കണമെന്നും ആവശ്യപ്പെട്ടുകൊണ്ടാണ് മുസ്ലിം ലീഗ് സായാഹ്ന ധര്‍ണ്ണ സംഘടിപ്പിച്ചത്.
ചെറുവണ്ണൂര്‍ പഞ്ചായത്ത് ജനറല്‍ സെക്രട്ടറി അബ്ദുല്‍ കരീം കോച്ചേരി ഉല്‍ഘാടനം ചെയ്തു. ശാഖാ പ്രസിഡണ്ട് ടി.ടി.അഷ്‌റഫ് അദ്ധ്യക്ഷനായി.
സെക്രട്ടരി മുഹമ്മദ് കളിയെടുത്ത് സ്വാഗതം പറഞ്ഞു.മുസ്ലിം ലീഗ് പഞ്ചായത്ത് വൈസ് പ്രസിഡണ്ട് എന്‍. അഹമദ് മൗലവി, പി.സി ഉബൈദ്, ഷമീം കക്കറമുക്ക്, ആലക്കാട്ട് മുഹമ്മദ്, എ.കെ.സി അഫ്‌സല്‍, പി.സി. മുനീര്‍ എന്നിവര്‍ ധര്‍ണ്ണയെ അഭിസംബോധന ചെയ്തു.
Avala - pannimukk road passable; Muslim League organizes evening dharna
