അത്തോളി : വിവാഹഭ്യര്‍ത്ഥന നിരസിച്ചതിനെ തുടര്‍ന്ന് വീട്ടമ്മയെ കത്തി കൊണ്ട് കുത്തി കൊല്ലാന്‍ ശ്രമം, അത്തോളി സഹകരണ ആശുപത്രിക്ക് സമീപം വാടകയ്ക്ക് താമസിക്കുന്ന പേരാമ്പ്ര സ്വദേശിനിയായ വീട്ടമ്മയെയാണ് കൊടക്കല്ല് പെട്രോള്‍ പമ്പിന് സമീപം വാടക വീട്ടില്‍ താമസിക്കുന്ന മഷൂദ് (33) കത്തി വീശി കൊല്ലാന്‍ ശ്രമിച്ചത്.
അത്താണിയിലെ ഒരു ഷോപ്പിലെ ജീവനക്കാരിയാണ് വീട്ടമ്മ. രണ്ട് മക്കളുടെ മാതാവായ യുവതിയുടെ ഭര്‍ത്താവ് പ്രവാസിയാണ്. മഷൂദ് അത്താണി കൊങ്ങന്നൂര്‍ റോഡ് ജഗ്ഷ്‌നില്‍ മത്സ്യക്കടയില്‍ ജോലി ചെയ്തിരുന്നു. ഇപ്പോള്‍ ഒരു മാസമായി ഇവിടെ നിന്നും ഒഴിവാക്കി.കുറച്ച് ദിവസങ്ങളായി ഇയാള്‍ വീട്ടമ്മയുമായി സൗഹൃദം സ്ഥാപിച്ചു. തുടര്‍ന്ന് വിവാഹാഭ്യര്‍ത്ഥന നടത്തിയെങ്കിലും അവര്‍ നിരസിച്ചു. കടയില്‍ നിന്നും മടങ്ങും വഴി വീടിന് സമീപത്ത് വെച്ചാണ് സംഭവം നടന്നത്.
വീടിന് മുന്‍പില്‍സ്‌കൂട്ടര്‍ നിര്‍ത്തി മുന്നോട്ട് നടക്കുമ്പോള്‍ പുറകില്‍ നിന്നും എത്തി കഴുത്തിന് നേരെ മഷൂദ് കത്തി കൊണ്ട് വീശുകയായിരുന്നുവെന്ന്, വിവരം അറിഞ്ഞ് ആശുപത്രിയില്‍ എത്തിയ വീട്ടമ്മയുടെ അയല്‍വാസി പറഞ്ഞു. കഴുത്തിന് മുറിവേറ്റ യുവതിയെ മലബാര്‍ മെഡിക്കല്‍ കോളെജ് ആശുപത്രിയില്‍ പ്രവേശിപ്പിച്ചു.
കഴുത്തില്‍ ഷാള്‍ ഉള്ളതിനാലാണ് ആഴത്തില്‍ മുറിവേല്‍ക്കാതെ രക്ഷപ്പെട്ടത്. ആറോളം തുന്നിട്ടാണ് മുറി തുന്നി കൂട്ടിയത്. വീട്ടമ്മ അപകട നില തരണം ചെയ്തതായി ആശുപത്രി അധികൃതര്‍ പറഞ്ഞു. യുവതിയുടെ പരാതിയില്‍ മഷൂദിനെതിരെ വധശ്രമത്തിന് കേസെടുത്തു. പ്രതിക്കായി അന്വേഷണം ഊര്‍ജിതമാക്കിയതായി അത്തോളി പൊലീസ് അറിയിച്ചു.
Attempted to stab a woman from Perambra who refused his marriage proposal; A case of attempted murder against the youth
