---
title: "നാസയുടെ പേരില്‍ തട്ടിപ്പ് നടത്തിയ പേരാമ്പ്ര സ്വദേശി അറസ്റ്റില്‍ "
english_title: "Perambra native arrested for NASA scam"
publisher: "perambranews.in"
canonical_url: "https://perambra.truevisionnews.com/news/28767/perambra-native-arrested-for-nasa-scam"
published_at: "2022-02-27T18:03:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/621b702f5ab22_vvvv - Copy (3) - Copy copy.jpg"
keywords: []
---

# നാസയുടെ പേരില്‍ തട്ടിപ്പ് നടത്തിയ പേരാമ്പ്ര സ്വദേശി അറസ്റ്റില്‍ 

> **Lead Summary:** **പേരാമ്പ്ര:** നാസയുടെ പേരില്‍ തട്ടിപ്പ് നടത്തിയ പേരാമ്പ്ര സ്വദേശി അറസ്റ്റില്‍. പേരാമ്പ്ര കോടേരിച്ചാല്‍ സ്വദേശി വാഴാട്ട് ഹൗസില്‍ ബിജുകുമാറാണ് അറസ്റ്റിലായത്.

## Article Content

**പേരാമ്പ്ര:** നാസയുടെ പേരില്‍ തട്ടിപ്പ് നടത്തിയ പേരാമ്പ്ര സ്വദേശി അറസ്റ്റില്‍. പേരാമ്പ്ര കോടേരിച്ചാല്‍ സ്വദേശി വാഴാട്ട് ഹൗസില്‍ ബിജുകുമാറാണ് അറസ്റ്റിലായത്.

തളിപ്പറമ്പ് സ്വദേശികളായ റിട്ട.സര്‍ക്കാരുദ്യോഗസ്ഥ ദമ്പതിമാരുടെ ഒന്നേകാല്‍ക്കോടിയിലധികം രൂപ തട്ടിയെടുത്ത കേസിലാണ് അറസ്റ്റ്. ജില്ലാ ക്രൈംബ്രാഞ്ച് ഡിവൈഎസ്പി പി.വി മനോജ് കുമാറിന്റെ നേതൃത്വത്തില്‍ എസ്.ഐ ദിനേശന്‍, പോലിസ് ഉദ്യോഗസ്ഥരായ സുജിത്ത്, പ്രശാന്ത് എന്നിവരടങ്ങിയ സംഘമാണം അറസ്റ്റു ചെയ്തത്.

ചെന്നൈ കേന്ദ്രീകരിച്ച് ആരംഭിക്കുന്ന നാസയുടെ ഡയറക്ട് കോണ്‍ട്രാക്ട് സ്പേസ് ടെക്നോളജി കമ്പനിയുടെ ഭാഗമായി പ്രവര്‍ത്തിക്കുന്ന സ്വന്തം സ്ഥാപനത്തില്‍ പങ്കാളിയാക്കാമെന്ന് വിശ്വസിപ്പിച്ചാണ് തളിപ്പറമ്പ് സ്വദേശിയില്‍ നിന്ന് 1.26 കോടി രൂപയും 20 പവന്റെ ആഭരണങ്ങളും തട്ടിയെടുത്തത്.

പൂക്കോത്ത് തെരു സ്വദേശി റിട്ട. ഉദ്യോഗസ്ഥന്‍ പി ഭാര്‍ഗവന്റെ ഉന്നത വിദ്യാഭ്യാസം നേടിയ മകനെ ചെന്നൈ കേന്ദ്രീകരിച്ച് തുടങ്ങുന്ന നാസ പ്രൊജക്ടില്‍ പങ്കാളിയാക്കാമെന്ന് വിശ്വസിപ്പിച്ചാണ് ബിജുകുമാര്‍ സുഹൃത്തുക്കളായ സുമേഷ്, പ്രശാന്ത് എന്നിവരുടെ സഹായത്തോടെ തട്ടിപ്പ് നടത്തിയത്.

2015 മുതല്‍ 2020 വരെയുള്ള അഞ്ച് വര്‍ഷ കാലയളവിലാണ് നേരിട്ട് പണമായും ബാങ്ക് അക്കൗണ്ട് വഴിയും 1.26 കോടി രൂപയും 20 പവന്റെ സ്വര്‍ണാഭരണങ്ങളും ചതിയിലൂടെ കൈക്കലാക്കിയത്.

പിന്നീട് മകനെ പ്രൊജക്ടില്‍ പങ്കാളിയാക്കുകയോ കൊടുത്ത പണം തിരിച്ചുനല്‍കാതെയും വിശ്വാസവഞ്ചന നടത്തിയതിനെ തുടര്‍ന്ന് ദമ്പതികള്‍ തളിപ്പറമ്പ് പോലിസില്‍ പരാതി നല്‍കി.

ഒരു കോടിയില്‍പരം രൂപ തട്ടിയെടുത്ത കേസ് ആയതിനാല്‍ കേസന്വേഷണം റൂറല്‍ പോലിസ് മേധാവിയുടെ നിയന്ത്രണത്തിലുള്ള ജില്ലാ ക്രൈംബ്രാഞ്ചിന് കേസ് കൈമാറി.

തുടര്‍ന്ന് കഴിഞ്ഞ മാസം അന്വേഷണം ഏറ്റെടുത്ത ഡിവൈ.എസ്.പി പി.വി മനോജ് കുമാറിന്റെ നേതൃത്വത്തിലുള്ള പോലിസ് സംഘം പ്രതിയെ അന്വേഷിച്ച് പേരാമ്പ്രയിലെത്തിയെങ്കിലും ഇയാള്‍ നാട്ടില്‍ നിന്ന് മുങ്ങിയതായി മനസിലായി.'

തട്ടിയെടുത്ത പണം കൊണ്ട് പേരാമ്പ്ര കൂരാച്ചുണ്ടിലും മറ്റുമായി ഇയാള്‍ അഞ്ചോളം ബേക്കറി തുടങ്ങുവാനുള്ള ഇന്റീരിയല്‍ വര്‍ക്ക് നടത്തി വരുന്നതായി കണ്ടെത്തി.

തുടര്‍ന്ന് അന്വേഷണ സംഘം നടത്തിയ രഹസ്യ നീക്കത്തിലൂടെയാണ് തമിഴ്നാട്ടിലെ ഉദുമല്‍പേട്ടില്‍ വെച്ച് പ്രതിയെ അറസ്റ്റു ചെയ്തത്. ചെന്നൈ ഐ.ഐ.ടിയില്‍ നിന്നും ബിടെക് എഞ്ചിനിയറിങ് ബിരുദധാരിയാണെന്നാണ് ഇയാള്‍ വിശ്വസിപ്പിച്ചിരുന്നത്.

ദമ്പതികളുടെ മകളുടെ എം.ബി.ബി.എസ് മെഡിക്കല്‍ സീറ്റില്‍ പ്രവേശന ഘട്ടത്തിലാണ് അറസ്റ്റിലായ ബിജു കുമാറുമായി തട്ടിപ്പിനിരയായവര്‍ പരിചയപ്പെട്ടത്. ഇയാളുടെ വാക്ചാതുര്യത്തിലാണ് ഇവര്‍ കബളിപ്പിക്കപ്പെട്ടത്.

അന്വേഷണ സംഘം തളിപ്പറമ്പ് കോടതിയില്‍ ഹാജരാക്കിയ പ്രതിയെ രണ്ടാഴ്ചത്തേക്ക് റിമാന്റ് ചെയ്തു.

### Related Links & Sources
- [Original Story Source](https://perambra.truevisionnews.com/news/28767/perambra-native-arrested-for-nasa-scam)