---
title: "മകനെ ഉപേക്ഷിക്കാന്‍ യുവതിക്ക് പ്രേരണ നല്‍കി; കായണ്ണ മാട്ടനോട് സ്വദേശി സിദ്ധന്‍ അറസ്റ്റില്‍ "
english_title: "Motivates young woman to abandon son; Siddhan, a native of Kayanna Mattan, arrested"
publisher: "perambranews.in"
canonical_url: "https://perambra.truevisionnews.com/news/32741/motivates-young-woman-to-abandon-son-siddhan-a-native-of-kayanna-mattan-arrested"
published_at: "2022-03-19T20:52:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6235f69b9b939_vvvv - Copy (3) - Copy.JPG"
keywords: []
---

# മകനെ ഉപേക്ഷിക്കാന്‍ യുവതിക്ക് പ്രേരണ നല്‍കി; കായണ്ണ മാട്ടനോട് സ്വദേശി സിദ്ധന്‍ അറസ്റ്റില്‍ 

> **Lead Summary:** **പേരാമ്പ്ര:** പതിമൂന്ന് വയസ്സുള്ള മകനെ ഉപേക്ഷിക്കാന്‍ യുവതിക്ക് പ്രേരണ നല്‍കിയ സംഭവത്തില്‍ സിദ്ധനെ പൊലീസ് അറസ്റ്റ് ചെയ്തു. കായണ്ണ മാട്ടനോട് ചാരുപറമ്പില്‍ രവിയെ ആണു ജുവനൈല്‍ ജസ്റ്റിസ് ആക്ട് പ്രകാരം കാക്കൂര്‍ പൊലീസ് അറസ്റ്റ് ചെയ്തത്.

## Article Content

**പേരാമ്പ്ര:** പതിമൂന്ന് വയസ്സുള്ള മകനെ ഉപേക്ഷിക്കാന്‍ യുവതിക്ക് പ്രേരണ നല്‍കിയ സംഭവത്തില്‍ സിദ്ധനെ പൊലീസ് അറസ്റ്റ് ചെയ്തു. കായണ്ണ മാട്ടനോട് ചാരുപറമ്പില്‍ രവിയെ ആണു ജുവനൈല്‍ ജസ്റ്റിസ് ആക്ട് പ്രകാരം കാക്കൂര്‍ പൊലീസ് അറസ്റ്റ് ചെയ്തത്.

ഫെബ്രുവരി 12നു ബാലുശ്ശേരിക്കാരിയായ യുവതിയെ കാണാനില്ലെന്നും പറഞ്ഞ് മകന്‍ പൊലീസില്‍ പരാതി നല്‍കിയിരുന്നു. തുടര്‍ന്ന് നടത്തിയ അന്വേഷണത്തില്‍ യുവതിയെ കണ്ടെത്തിയിരുന്നു. എന്നാല്‍ മകനെ ഉപേക്ഷിച്ചതിനു യുവതിക്കെതിരെ കേസെടുക്കുകയും ചെയ്തു.

തുടര്‍ന്ന് യുവതിയുടെ മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് രവിയെക്കുറിച്ചുള്ള വിവരം ലഭിച്ചത്. ഏതാനും ദിവസങ്ങള്‍ക്കുള്ളില്‍ തന്നെ ഇവര്‍ 2858 തവണ ഫോണില്‍ സംസാരിച്ചതായി പൊലീസ് കണ്ടെത്തി.

രവിയും യുവതിയും വിവിധ സ്ഥലങ്ങളില്‍ താമസിച്ചതിന്റെ രേഖകളും പൊലീസിനു ലഭിച്ചിരുന്നു. ഇതോടെയാണ് മകനെ ഉപേക്ഷിക്കാന്‍ പ്രേരിപ്പിച്ചതിനു രവിക്കെതിരെ പൊലീസ് കേസെടുത്തത്. വീടിനോട് ചേര്‍ന്ന് അമ്പലം പണിത് കര്‍മങ്ങള്‍ നടത്തി വരുന്നയാളാണ് പ്രതി രവി.

ജീവിതത്തിലെ പ്രശ്നങ്ങള്‍ക്ക് പരിഹാരം തേടി ഭക്തരായി എത്തുന്ന സ്ത്രീകളെ വശത്താക്കി പ്രതി ചൂഷണം ചെയ്തിരുന്നതായി പൊലീസിനു വിവരം ലഭിച്ചിട്ടുണ്ട്.

കാക്കൂര്‍ ഇന്‍സ്പെക്ടര്‍ ബി.കെ.സിജുവിന്റെ നേതൃത്വത്തില്‍ നടത്തിയ അന്വേഷണത്തില്‍ എസ്ഐ എം.അബ്ദുല്‍ സലാം, എഎസ്ഐ കെ.കെ.രാജന്‍, സീനിയര്‍ സിവില്‍ പൊലീസ് ഓഫിസര്‍മാരായ സുജാത, റിയാസ്, ബിജേഷ്, സുബിജിത്ത് എന്നിവര്‍ ഉള്‍പ്പെട്ട സംഘമാണ് പ്രതിയെ കണ്ടെത്തിയത്.

കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. വിവാഹമോചിതര്‍, വിധവകള്‍ തുടങ്ങി ഒട്ടേറെ സ്ത്രീകളെ ഇയാള്‍ കബളിപ്പിച്ചതായി പൊലീസ് അന്വേഷണത്തില്‍ വ്യക്തമായി. ഈ ദിശയിലും അന്വേഷണം പുരോഗമിക്കുന്നതായി പൊലീസ് പറഞ്ഞു.

### Related Links & Sources
- [Original Story Source](https://perambra.truevisionnews.com/news/32741/motivates-young-woman-to-abandon-son-siddhan-a-native-of-kayanna-mattan-arrested)