പേരാമ്പ്ര: ചെറുവണ്ണൂര് പഞ്ചായത്തില് പ്രവര്ത്തിക്കുന്ന ഹരിത കര്മ്മ സേനയില് സാമ്പത്തിക തട്ടിപ്പും ക്രമക്കേടും നടത്തിയ ഹരിത കര്മ്മസേന ചെറുവണ്ണൂര് പഞ്ചായത്ത് കമ്മറ്റി സെക്രട്ടറിയെ പുറത്താക്കണമെന്ന് അഴിമതി വിരുദ്ധ സമിതി പേരാമ്പ്ര മേഖലാ കമ്മറ്റി ആവശ്യപ്പെട്ടു.
സംസ്ഥാന സര്ക്കാരിന്റെ സമ്പൂര്ണ്ണ മാലിന്യ മുക്ത പദ്ധതിയായ ഹരിത കേരള മിഷന്റെ കീഴില് 2017 ലാണ് ഹരിത കര്മ്മ സേന രൂപീകരിക്കുന്നത്. പഞ്ചായത്തിലെ വിവിധ വാര്ഡുകളില് നിന്ന് 32 അംഗങ്ങളാണ് ഹരിത കര്മ്മ സേനയില് പ്രവര്ത്തിക്കുന്നത്.
ഓരോ മാസവും പഞ്ചായത്തിലെ മുഴുവന് വീടുകളില് നിന്നും, കച്ചവട സ്ഥാപനങ്ങളില് നിന്നും പ്ലാസ്റ്റിക്ക് കവറുകളും, ബോട്ടിലുകളും, ഇലട്രോണിക് വെയിസ്റ്റുകളും, തുണിത്തരങ്ങളും, ചെരിപ്പ്, ബാഗ്, ലെതര്, കുപ്പിച്ചില്ല് മുതലായ വസ്തുക്കളും ശേഖരിച്ച് പഞ്ചായത്തിന്റെ ഗോഡൗണില് (എംസിഎഫ്) എത്തിച്ച് വെവ്വേറെ തരംതിരിച്ച് വെക്കുന്ന ജോലിയാണ് ഹരിത കര്മ്മ സേനാംഗങ്ങള് നിര്വ്വഹിക്കുന്നത്.
ശേഖരിച്ച വസ്തുക്കള് ഹരിത കേരള മിഷന്റെ സംസ്ക്കരണ പ്ലാന്റുകളിലേക്ക് കൊണ്ടുപോകും. വീടുകളില്നിന്നും കടകളില്നിന്നും ശേഖരിക്കുന്ന വസ്തുക്കള്ക്ക് യഥാക്രമം ഒരുചാക്കിന് 50 രൂപയും, 100 രൂപയും ഈടാക്കുന്നുണ്ട്.
ഇത് കൂടാതെ ഹരിത കര്മ്മ സേന വീടുകളില് കല്യാണ പാര്ട്ടികള്ക്കും, മറ്റ് ചടങ്ങുകള്ക്കും ഭക്ഷണം കഴിക്കാന് പാത്രങ്ങള് വാടകക്ക് നല്കുകയും, ഭക്ഷണം വിളമ്പലിലൂടെയും വരുമാനം നേടുന്നുണ്ട്.
രണ്ട് മാസം കഴിയുമ്പോഴാണ് വീടുകളില് നിന്നും കടകളില് നിന്നും സേനാംഗങ്ങള് മാലിന്യം ശേഖരിക്കുന്നത്. ശേഖരിക്കുന്ന വസ്തുക്കള്ക്ക് ഓരോ തവണയും യൂസര് ഫീയായി ഏകദേശം 2,50,000 രൂപയോളം ലഭിക്കുന്നുണ്ട്.
ഈ തുക ബേങ്ക് അകൗണ്ടില് നിക്ഷേപിക്കാതെ, ഹരിത കര്മ്മ സേനാംഗങ്ങള്ക്ക് കൂലി കൊടുക്കാതെ സെക്രട്ടറി തിരിമറി നടത്തുന്നുവെന്നാണ് പ്രധാന ആരോപണം. രണ്ട് മാസത്തെ വരുമാനമായി ഒന്നിച്ച് ലഭിക്കുന്ന 2,50000 രൂപ രണ്ട് മാസത്തില് കൂടുതല് കൈയ്യില് സൂക്ഷിച്ചതിന് ശേഷം പിന്നീടാണ് സെക്രട്ടറി അകൗണ്ടില് പണം നിക്ഷേപിക്കുന്നത്, അതുവരെ അംഗങ്ങള്ക്ക് ചെയ്ത ജോലിക്ക് കൂലി ലഭിക്കില്ലെന്നും ആക്ഷേപമുണ്ട്.
2021 ഫിബ്രവരിയില് ഹരിത വര്ഷം അകൗണ്ടില് സ്ഥിര നിക്ഷേപമായി 20000 രൂപ നിക്ഷേപിക്കാന് ഹരിത കര്മ്മ സേനയുടെ പഞ്ചായത്ത് കമ്മറ്റി തീരുമാനിക്കുകയും പണം സെക്രട്ടറിയെ ഏല്പ്പിക്കുകയും ചെയ്തു.
എന്നാല് ഈ പണം ഇതുവരെ സെക്രട്ടറി ബേങ്കില് നിക്ഷേപിച്ചിട്ടില്ലെന്നും അഴിമതി വിരുദ്ധ സമിതി പറഞ്ഞു. ഇതുകൂടാതെ പാത്രങ്ങള് വാടകക്ക് നല്കിയ വകയിലും ഭക്ഷണം വിളമ്പിയ വകയിലും ലഭിച്ച 41000 രൂപ ഹരിതവര്ഷം അകൗണ്ടില് നിക്ഷേപിച്ചിരുന്നു.
എന്നാല് ഈ പണം ഹരിത കര്മ്മ സേനയുടെ സെക്രട്ടറി പ്രസിഡണ്ടോ മറ്റ് അംഗങ്ങളോ അറിയാതെ പിന്വലിക്കുകയും കൂലി കൊടുക്കാതിരിക്കുകയും ചെയ്തു. പ്രസിഡണ്ടും, സെക്രട്ടറിയും ഉള്പ്പെട്ട ജോയിന്റ് അകൗണ്ടാണ് ഹരിത കര്മ്മ സേനയുടേത്.
എന്നാല് പ്രസിഡണ്ടിനെക്കൊണ്ട് നിരവധി ചെക്കുകളില് മുന്കൂട്ടി ഒന്നിച്ച് ഒപ്പിട്ട് വാങ്ങി വെച്ചിട്ടാണ് സെക്രട്ടറി പണം പിന്വലിച്ചത്. ഹരിത കര്മ്മ സേനയുടെ അകൗണ്ടില് ഒരു നയാ പൈസയും ഇപ്പോള് ബാക്കിയില്ല, പഞ്ചായത്തിന്റെ ഗോഡൗണില്(MCF) സൂക്ഷിച്ചു വെക്കുന്ന പ്ലാസ്റ്റിക്ക് കുപ്പികളും, വില ലഭിക്കുന്ന മറ്റ് പ്ലാസ്റ്റിക്ക്മാലിന്യങ്ങളും ഹരിത കര്മ്മ സേനയുടെ സെക്രട്ടറിഎടുത്തുകൊണ്ടു പോയി ആക്രിക്കടക്കാര്ക്ക് വിറ്റ് പണം സ്വന്തമാക്കുകയും ചെയ്തുവെന്ന ആരോപണവും നിലവിലുണ്ട്.
2017 മുതല് സെക്രട്ടറി ഈ പ്രവര്ത്തി തുടരുന്നു. ഇങ്ങനെ കിട്ടുന്ന പണം നാളിതുവരെ അകൗണ്ടില് നിക്ഷേപിച്ചിട്ടില്ല, സ്ഥാപനത്തിന്റെ ചുമതല നിര്വ്വഹിക്കാതെ, തട്ടിപ്പും വെട്ടിപ്പുമാണ് സെക്രട്ടറി കഴിഞ്ഞ അഞ്ച് വര്ഷവും നടത്തിയിട്ടുള്ളതെന്നും ഇവര് പറഞ്ഞു.
സാമ്പത്തിക തട്ടിപ്പ് നടത്തിയ സെക്രട്ടറിയെ വെച്ചു കൊണ്ട് ഇനിയും ഈ സ്ഥാപനത്തിന് മുന്നോട്ട് പോകാന് കഴിയില്ലെന്നും സാമ്പത്തിക അഴിമതിയും, ക്രമക്കേടും നടത്തിയ ഹരിത കര്മ്മ സേനയുടെ സെക്രട്ടറിയെ പുറത്താക്കണമെന്നും അഴിമതി വിരുദ്ധ സമിതി പറഞ്ഞു.
കഴിഞ്ഞ 5വര്ഷത്തെ ഹരിത കര്മ്മ സേനയുടെ മുഴുവന് അകൗണ്ടും പരിശോധിക്കണമെന്നും സമിതി ആവശ്യപ്പെട്ടു. ചെറുവണ്ണൂരിലെ ഭരണകക്ഷിയിലെ ഒരു ഉന്നതന്റെ പിന്തുണയിലാണ് സെക്രട്ടറി ഇത്തരം പ്രവര്ത്തിയുമായി മുന്നോട്ട് പോകുന്നതെന്നും ഇവര് കൂട്ടിച്ചേര്ത്തു.
Financial fraud in Cheruvannur Haritha Karmasena; Anti-Corruption Committee urges secretary to step down