---
title: "കക്കയം ഡാമിന്റെ ഷട്ടറുകള്‍ തുറന്നു; കുറ്റ്യാടി പുഴയുടെ തീരത്തുള്ളവര്‍ ജാഗ്രത പാലിക്കണം"
english_title: "Kakkayam Dam's shutters opened; people on the banks of Kuttiadi River should be cautious"
publisher: "perambranews.in"
canonical_url: "https://perambra.truevisionnews.com/news/376254/kakkayam-dams-shutters-opened-people-on-the-banks-of-kuttiadi-river-should-be-cautious"
published_at: "2026-08-02T23:27:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a6f857a19093_kkym.jpg"
keywords: []
---

# കക്കയം ഡാമിന്റെ ഷട്ടറുകള്‍ തുറന്നു; കുറ്റ്യാടി പുഴയുടെ തീരത്തുള്ളവര്‍ ജാഗ്രത പാലിക്കണം

> **Lead Summary:** **കുറ്റ്യാടി: **കക്കയം ഡാമിന്റെ ഷട്ടറുകള്‍ തുറന്നു. കുറ്റ്യാടി പുഴയുടെ തീരത്തുള്ളവര്‍ ജാഗ്രത പാലിക്കണമെന്ന് നിര്‍ദ്ദേശം. രണ്ട് സ്പില്‍വേ ഷട്ടറുകള്‍ കാല്‍ അടി വീതമാണ് ഉയര്‍ത്തിയിട്ടുള്ളത്. യാതൊരു കാരണവശാലും ആരും പുഴയില്‍ ഇറങ്ങാന്‍ പാടുള്ളതല്ലെന്നും പുഴയുടെ തീരങ്ങളില്‍ താമസിക്കുന്നവര്‍ അതീവ ജാഗ്രത പാലിക്കണമെന്നും മുന്നറിയിപ്പുണ്ട്. പുഴയില്‍ ഒന്നര മീറ്ററോളം വെള്ളം ഉയരാന്‍ സാധ്യതയുണ്ടെന്ന് അധികൃതര്‍ അറിയിച്ചു.

## Article Content

**കുറ്റ്യാടി: **കക്കയം ഡാമിന്റെ ഷട്ടറുകള്‍ തുറന്നു. കുറ്റ്യാടി പുഴയുടെ തീരത്തുള്ളവര്‍ ജാഗ്രത പാലിക്കണമെന്ന് നിര്‍ദ്ദേശം. രണ്ട് സ്പില്‍വേ ഷട്ടറുകള്‍ കാല്‍ അടി വീതമാണ് ഉയര്‍ത്തിയിട്ടുള്ളത്. യാതൊരു കാരണവശാലും ആരും പുഴയില്‍ ഇറങ്ങാന്‍ പാടുള്ളതല്ലെന്നും പുഴയുടെ തീരങ്ങളില്‍ താമസിക്കുന്നവര്‍ അതീവ ജാഗ്രത പാലിക്കണമെന്നും മുന്നറിയിപ്പുണ്ട്. പുഴയില്‍ ഒന്നര മീറ്ററോളം വെള്ളം ഉയരാന്‍ സാധ്യതയുണ്ടെന്ന് അധികൃതര്‍ അറിയിച്ചു.

കക്കയം ഡാമിന്റെ വൃഷ്ടി പ്രദേശത്ത് അതിശക്തമായ മഴ പെയ്തിരുന്നു. തുടര്‍ന്ന് ഡാമിലേക്ക് നീരൊഴുക്ക് ശക്തമാകുകയും ചെയ്തു. അതിനാലാണ് ഷട്ടറുകള്‍ തുറന്നത്.

**പൊതുജനങ്ങള്‍ക്കുള്ള നിര്‍ദേശങ്ങള്‍ **

പുഴകള്‍, തോടുകള്‍, ഡാമിന്റെ താഴ്ഭാഗങ്ങള്‍ എന്നിവിടങ്ങളിലേക്ക് അനാവശ്യമായി പോകരുത്. പുഴയോരങ്ങളിലും താഴ്ന്ന പ്രദേശങ്ങളിലും താമസിക്കുന്നവര്‍ ജലനിരപ്പ് നിരന്തരം നിരീക്ഷിക്കുക. മത്സ്യബന്ധനം, കുളിക്കല്‍, സെല്‍ഫി എടുക്കല്‍ തുടങ്ങിയ അപകടസാധ്യതയുള്ള പ്രവര്‍ത്തനങ്ങള്‍ പൂര്‍ണമായും ഒഴിവാക്കുക. കുട്ടികളെ പുഴയോരങ്ങളിലേക്കോ വെള്ളക്കെട്ടുള്ള പ്രദേശങ്ങളിലേക്കോ പോകാന്‍ അനുവദിക്കരുത്.

രാത്രികാല യാത്രകള്‍ പരമാവധി ഒഴിവാക്കുക. അടിയന്തര സാഹചര്യത്തില്‍ ബന്ധപ്പെട്ട വകുപ്പുകളുടെ നിര്‍ദേശങ്ങള്‍ പാലിക്കുക. ഔദ്യോഗിക അറിയിപ്പുകള്‍ മാത്രം വിശ്വസിക്കുക. അഭ്യൂഹങ്ങള്‍ പ്രചരിപ്പിക്കരുത്. ദുരന്തനിവാരണ പ്രവര്‍ത്തനങ്ങള്‍ ജില്ലയില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂമുകള്‍ സജ്ജമാണ്. ദുരിതാശ്വാസ ക്യാമ്പുകള്‍ തുറക്കുന്നതിനുള്ള മുന്നൊരുക്കങ്ങളും പൂര്‍ത്തിയാക്കിയിട്ടുണ്ട്. കക്കയം, കുറ്റ്യാടി മേഖലകളിലെ ജനങ്ങള്‍ പ്രത്യേക ജാഗ്രത പാലിക്കണമെന്ന് കളക്ടര്‍ അഭ്യര്‍ത്ഥിച്ചു.

### Related Links & Sources
- [Original Story Source](https://perambra.truevisionnews.com/news/376254/kakkayam-dams-shutters-opened-people-on-the-banks-of-kuttiadi-river-should-be-cautious)