---
title: "പ്ലസ് വൺ വിദ്യാർത്ഥിക്ക് ക്രൂരമർദ്ദനം; പത്ത് വിദ്യാർത്ഥികളെ സസ്പെൻഡ് ചെയ്തു"
english_title: "Plus One Student Assaulted For Refusing To Sing Song And Give Money Ten Students Suspended In Perambra"
publisher: "perambranews.in"
canonical_url: "https://perambra.truevisionnews.com/news/383307/perambra-palerivattkumbad-plus-one-student-ragging-assault-ten-suspended"
published_at: "2026-09-18T15:44:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aad107c62fc8_uyyyy.jpg"
keywords: ["Perambra News", "Ragging Case", "School Student Assault", "Paleri Vadakkumbad School"]
---

# പ്ലസ് വൺ വിദ്യാർത്ഥിക്ക് ക്രൂരമർദ്ദനം; പത്ത് വിദ്യാർത്ഥികളെ സസ്പെൻഡ് ചെയ്തു

> **Lead Summary:**  പേരാമ്പ്ര: പാട്ടുപാടാനും പണം നൽകാനും വിസമ്മതിച്ച പ്ലസ് വൺ വിദ്യാർത്ഥിക്ക് നേരെ ക്രൂരമായ മർദ്ദനം. സംഭവത്തിൽ പത്ത് വിദ്യാർത്ഥികളെ സസ്പെൻഡ് ചെയ്തു. പാലേരി വടക്കുമ്പാട് ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥിക്ക് നേരെയാണ് പ്ലസ് ടു വിദ്യാർത്ഥികളുടെ മർദ്ദനവും റാഗിംഗും ഉണ്ടായത് എന്നാണ് പരാതി.

## Article Content

 പേരാമ്പ്ര: പാട്ടുപാടാനും പണം നൽകാനും വിസമ്മതിച്ച പ്ലസ് വൺ വിദ്യാർത്ഥിക്ക് നേരെ ക്രൂരമായ മർദ്ദനം. സംഭവത്തിൽ പത്ത് വിദ്യാർത്ഥികളെ സസ്പെൻഡ് ചെയ്തു. പാലേരി വടക്കുമ്പാട് ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥിക്ക് നേരെയാണ് പ്ലസ് ടു വിദ്യാർത്ഥികളുടെ മർദ്ദനവും റാഗിംഗും ഉണ്ടായത് എന്നാണ് പരാതി.

സ്കൂളിനുള്ളിൽ വെച്ച് പാട്ടുപാടാൻ ആവശ്യപ്പെടുകയും പണം ചോദിക്കുകയും ചെയ്തത് അനുസരിക്കാത്തതിന്റെ വിരോധത്തിലാണ് മർദ്ദനം ഉണ്ടായത് എന്നാണ് വിവരം. സ്കൂളിന് പുറത്തെ വിവിധ സ്ഥലങ്ങളിലായി സീനിയർ വിദ്യാർത്ഥികൾ ചേർന്ന് കുട്ടിയെ മൂന്ന് വ്യത്യസ്ത ഇടങ്ങളിൽ വെച്ച് വളഞ്ഞിട്ട് ക്രൂരമായി മർദ്ദിക്കുകയായിരുന്നു എന്നാണ് രക്ഷിതാക്കളുടെ പരാതിയിൽ പറയുന്നത്. ഈ ആക്രമണത്തിനിടയിൽ കുട്ടിയുടെ സ്കൂൾ ബാഗും പാഠപുസ്തകങ്ങളും പൂർണമായും നശിപ്പിച്ചതായും പറയുന്നു.

മർദ്ദനത്തിൽ നിന്ന് ഓടി രക്ഷപ്പെട്ട് ഒരു ബന്ധുവിന്റെ വീടിന് മുന്നിലെത്തിയ കുട്ടിയെ പ്രതികൾ പിന്തുടർന്നെത്തുന്നതിന്റെ സിസിടിവി ദൃശ്യങ്ങളും ഇപ്പോൾ പുറത്തുവന്നിട്ടുണ്ട് എന്നാണ് വിവരം. ദൃശ്യങ്ങളിൽ കുട്ടി ഓടി എത്തുന്നതും പിന്നാലെ വിദ്യാർത്ഥികൾ എത്തുന്നതും കാണാം എന്നാണ് റിപ്പോർട്ട്.

സംഭവത്തിൽ പത്ത് പ്ലസ് ടു വിദ്യാർത്ഥികളെ സ്കൂൾ മാനേജ്മെന്റ് സസ്പെൻഡ് ചെയ്തു. മർദ്ദനമേറ്റ കുട്ടിയുടെ രക്ഷിതാക്കളുടെ പരാതിയിൽ പേരാമ്പ്ര പൊലീസ് കേസെടുത്ത് അന്വേഷണം ഊർജിതമാക്കിയിട്ടുണ്ട് എന്നാണ് പൊലീസിന്റെ നിലപാട്.

മർദ്ദനത്തിൽ പ്ലസ് വൺ വിദ്യാർത്ഥിക്ക് സാരമായ പരിക്കുകൾ പറ്റിയിട്ടുണ്ടെന്നാണ് ബന്ധുക്കൾ പറയുന്നത്. വയറ്റിൽ ചവിട്ടേറ്റതായും ഡോക്ടറുടെ സേവനം തേടിയതായും ബന്ധുക്കൾ അറിയിച്ചു. കുട്ടി നിലവിൽ ചികിത്സയിലാണ്. സംഭവത്തിൽ വിശദമായ അന്വേഷണം നടത്തിവരികയാണെന്നും നിയമനടപടികൾ സ്വീകരിക്കുമെന്നും പൊലീസ് അറിയിച്ചു. സ്കൂളിൽ റാഗിംഗ് വിരുദ്ധ നിയമങ്ങൾ കർശനമാക്കുമെന്നും മാനേജ്മെന്റ് വ്യക്തമാക്കി.

### Related Links & Sources
- [Original Story Source](https://perambra.truevisionnews.com/news/383307/perambra-palerivattkumbad-plus-one-student-ragging-assault-ten-suspended)