---
title: "വിഷരഹിത വിഷുവിന് നാടൊരുങ്ങുന്നു; പേരാമ്പ്ര വെസ്റ്റ് മേഖലയില്‍ പച്ചക്കറി കൃഷിക്ക് തുടക്കമായി"
english_title: "Toxic-Free Vishu Organic Vegetable Farming Starts in Perambra West Region"
publisher: "perambranews.in"
canonical_url: "https://perambra.truevisionnews.com/news/389773/perambra-west-organic-vegetable-farming-toxic-free-vishu-project"
published_at: "2026-11-01T18:49:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ae73ccb14830_vishu.JPG"
keywords: ["Perambra West Organic Farming", "Toxic Free Vishu", "Karshaka Sangham Perambra", "Eravattur Workshop", "Organic Vegetables Kerala", "Perambra Agriculture News"]
---

# വിഷരഹിത വിഷുവിന് നാടൊരുങ്ങുന്നു; പേരാമ്പ്ര വെസ്റ്റ് മേഖലയില്‍ പച്ചക്കറി കൃഷിക്ക് തുടക്കമായി

> **Lead Summary:** **പേരാമ്പ്ര: **വരാനിരിക്കുന്ന വിഷുക്കാലത്ത് മലയാളിയുടെ തീന്‍മേശയിലേക്ക് പൂര്‍ണമായും വിഷരഹിതമായ പച്ചക്കറികള്‍ എത്തിക്കാന്‍ മാതൃകാപരമായ പദ്ധതിയുമായി കര്‍ഷകസംഘം പേരാമ്പ്ര വെസ്റ്റ് മേഖല. മേഖലാ പരിധിയിലെ മുഴുവന്‍ യൂണിറ്റുകളിലും ഓര്‍ഗാനിക് പച്ചക്കറി ഉല്‍പ്പാദനം വ്യാപിപ്പിക്കാനാണ് കര്‍ഷകരുടെ തീരുമാനം.

## Article Content

**പേരാമ്പ്ര: **വരാനിരിക്കുന്ന വിഷുക്കാലത്ത് മലയാളിയുടെ തീന്‍മേശയിലേക്ക് പൂര്‍ണമായും വിഷരഹിതമായ പച്ചക്കറികള്‍ എത്തിക്കാന്‍ മാതൃകാപരമായ പദ്ധതിയുമായി കര്‍ഷകസംഘം പേരാമ്പ്ര വെസ്റ്റ് മേഖല. മേഖലാ പരിധിയിലെ മുഴുവന്‍ യൂണിറ്റുകളിലും ഓര്‍ഗാനിക് പച്ചക്കറി ഉല്‍പ്പാദനം വ്യാപിപ്പിക്കാനാണ് കര്‍ഷകരുടെ തീരുമാനം.

നാടിന്റെ ആരോഗ്യസുരക്ഷ ഉറപ്പുവരുത്തുകയും വിപണിയിലെ രാസവസ്തു കലര്‍ന്ന പച്ചക്കറികളെ ആശ്രയിക്കുന്നത് കുറയ്ക്കുകയും ചെയ്യുക എന്നതാണ് പദ്ധതിയുടെ പ്രധാന ലക്ഷ്യം. ഹരിത വിപ്ലവത്തിന് തുടക്കമിട്ടുകൊണ്ട് കര്‍ഷകസംഘം പേരാമ്പ്ര വെസ്റ്റ് മേഖലാ കമ്മിറ്റിയുടെ ആഭിമുഖ്യത്തില്‍ എരവട്ടൂരില്‍ വിപുലമായ കാര്‍ഷിക ശില്പശാല സംഘടിപ്പിച്ചു.

പരിപാടിയുടെ ഉദ്ഘാടനം മുതിര്‍ന്ന കര്‍ഷകസംഘം നേതാവ് പി. ബാലന്‍ അടിയോടി നിര്‍വഹിച്ചു. നാടിന്റെ ആരോഗ്യസുരക്ഷ ഉറപ്പുവരുത്തുന്ന പദ്ധതിയുടെ വിശദാംശങ്ങള്‍ വി.കെ. പ്രമോദ് ശില്പശാലയില്‍ വിശദീകരിച്ചു. പദ്ധതിയുടെ ഭാഗമായി ഓരോ യൂണിറ്റിലും വിഷരഹിത പച്ചക്കറി തൈകള്‍ വിതരണം ചെയ്യാനും തരിശുനിലങ്ങള്‍ കൃഷിയോഗ്യമാക്കാനും തീരുമാനിച്ചിട്ടുണ്ട്.

പേരാമ്പ്ര കൃഷി അസിസ്റ്റന്റ് ഡോ. അഹല്‍ജിത്ത് രാമചന്ദ്രന്‍ കര്‍ഷകര്‍ക്കായി ശാസ്ത്രീയ കൃഷിരീതികളെക്കുറിച്ചുള്ള ബോധവല്‍ക്കരണ ക്ലാസുകള്‍ നയിച്ചു. ജൈവവളങ്ങളുടെ ഉപയോഗം, കീടനിയന്ത്രണത്തിനുള്ള ജൈവ മാര്‍ഗങ്ങള്‍ എന്നിവയെക്കുറിച്ച് അദ്ദേഹം വിശദീകരിച്ചു.

ചടങ്ങില്‍ കെ.പി. രവീന്ദ്രന്‍, വാര്‍ഡ് അംഗം സി. പത്മകല, വനജ ആനേരി എന്നിവര്‍ സംസാരിച്ചു. ടി.കെ. ഉണ്ണികൃഷ്ണന്‍ നന്ദിയും പറഞ്ഞു. ജനാരോഗ്യത്തിന് പ്രാധാന്യം നല്‍കുന്ന ഈ കാര്‍ഷിക മുന്നേറ്റത്തെ വലിയ ആവേശത്തോടെയാണ് നാട്ടുകാര്‍ സ്വീകരിച്ചിരിക്കുന്നത്.

### Related Links & Sources
- [Original Story Source](https://perambra.truevisionnews.com/news/389773/perambra-west-organic-vegetable-farming-toxic-free-vishu-project)