---
title: "പേരാമ്പ്രയില്‍ കെഎസ്എസ് പിഎ വനിതാ ഫോറം വനിതാ ഭാരവാഹികളെ ആദരിച്ചു"
english_title: "KSSPA Perambra Constituency Womens Forum Honours Women Office Bearers, Gold Medalist M Sujatha"
publisher: "perambranews.in"
canonical_url: "https://perambra.truevisionnews.com/news/390464/ksspa-perambra-womens-forum-honours-women-office-bearers-m-sujatha"
published_at: "2026-11-06T12:18:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aed7895d8d9c_ksspa-perambra-womens-forum-honours-women-office-bearers-m-sujatha.jpg"
keywords: ["KSSPA", "Womens Forum", "M Sujatha", "Honour Ceremony"]
---

# പേരാമ്പ്രയില്‍ കെഎസ്എസ് പിഎ വനിതാ ഫോറം വനിതാ ഭാരവാഹികളെ ആദരിച്ചു

> **Lead Summary:** **പേരാമ്പ്ര:** കെഎസ്എസ് പിഎ പേരാമ്പ്ര നിയോജകമണ്ഡലം വനിതാ ഫോറത്തിന്റെ നേതൃത്വത്തില്‍ വിവിധ മണ്ഡലങ്ങളില്‍ നിന്ന് തെരഞ്ഞെടുക്കപ്പെട്ട വനിതാ ഭാരവാഹികളെ ആദരിച്ചു.

## Article Content

**പേരാമ്പ്ര:** കെഎസ്എസ് പിഎ പേരാമ്പ്ര നിയോജകമണ്ഡലം വനിതാ ഫോറത്തിന്റെ നേതൃത്വത്തില്‍ വിവിധ മണ്ഡലങ്ങളില്‍ നിന്ന് തെരഞ്ഞെടുക്കപ്പെട്ട വനിതാ ഭാരവാഹികളെ ആദരിച്ചു.

പേരാമ്പ്രയില്‍ നടന്ന ചടങ്ങില്‍ വനിതാ നേതാക്കളുടെ പ്രവര്‍ത്തനങ്ങളെ അഭിനന്ദിച്ചും സംഘടനയെ ശക്തിപ്പെടുത്തുന്നതില്‍ അവര്‍ വഹിക്കുന്ന പങ്കിനെ അംഗീകരിച്ചുമാണ് ആദരവ് നല്‍കിയത്. പരിപാടിയുടെ ഔപചാരിക ഉദ്ഘാടനം കെഎസ്എസ് പിഎ സംസ്ഥാന സെക്രട്ടറിയേറ്റ് അംഗം കെ.സി. ഗോപാലന്‍ നിര്‍വ്വഹിച്ചു.

സംഘടനയുടെ പ്രവര്‍ത്തനങ്ങളില്‍ വനിതകളുടെ പങ്കാളിത്തം കൂടുതല്‍ ശക്തിപ്പെടുത്തണമെന്നും സ്ത്രീകളുടെ അവകാശങ്ങള്‍ക്കും ക്ഷേമത്തിനും വേണ്ടി ഒറ്റക്കെട്ടായി പ്രവര്‍ത്തിക്കണമെന്നും അദ്ദേഹം പറഞ്ഞു.

കെഎസ്എസ് പിഎ കോഴിക്കോട് ജില്ലാ സെക്രട്ടറി ഒ.എം. രാജന്‍ ഭാരവാഹികളെ ആദരിച്ചു. വിവിധ മണ്ഡലങ്ങളില്‍ നിന്ന് തെരഞ്ഞെടുക്കപ്പെട്ട് എത്തിയ വനിതാ ഭാരവാഹികള്‍ക്ക് അദ്ദേഹം ഉപഹാരം നല്‍കി ആദരവ് അറിയിച്ചു.

വിവിധ കായിക മത്സരങ്ങളില്‍ സ്വര്‍ണ്ണ മെഡലുകള്‍ കരസ്ഥമാക്കിയ എം. സുജാതയെയും ചടങ്ങില്‍ പ്രത്യേകം ആദരിച്ചു. കായിക രംഗത്ത് മികച്ച നേട്ടം കൈവരിച്ച സുജാതയ്ക്ക് ചടങ്ങില്‍ പങ്കെടുത്ത എല്ലാവരും അഭിനന്ദനങ്ങള്‍ അറിയിച്ചു. അവരുടെ നേട്ടം മറ്റ് വനിതകള്‍ക്കും പ്രചോദനമാണെന്ന് സംസാരിച്ചവര്‍ പറഞ്ഞു.

നിയോജകമണ്ഡലം വനിതാ ഫോറം പ്രസിഡണ്ട് ഇ.എം. പത്മിനി ചടങ്ങില്‍ അധ്യക്ഷത വഹിച്ചു. കെ.പി. സുലോചന, പി.കെ. രാഘവന്‍, എ. കണാരന്‍, പി സുഷമ, വി. ആലീസ് മാത്യു, സെല്‍മ, സ്‌നേഹ പ്രഭ, ശ്രീലത, എ ഗീത, സി ദേവി എന്നിവര്‍ ചടങ്ങില്‍ സംസാരിച്ചു.

സംഘടനയുടെ ഭാവി പ്രവര്‍ത്തനങ്ങളെക്കുറിച്ചും വനിതകളുടെ ഉന്നമനത്തിനായി നടപ്പാക്കേണ്ട പദ്ധതികളെക്കുറിച്ചും ചടങ്ങില്‍ ചര്‍ച്ചകള്‍ നടന്നു. നിരവധി വനിതാ പ്രവര്‍ത്തകരും അംഗങ്ങളും പരിപാടിയില്‍ പങ്കെടുത്തു.

### Related Links & Sources
- [Original Story Source](https://perambra.truevisionnews.com/news/390464/ksspa-perambra-womens-forum-honours-women-office-bearers-m-sujatha)