പേരാമ്പ്ര: തണലേകാന് ഇനി ഹാരിസിന്റെ കുടകള് ഉണ്ടാവില്ല. അപകടത്തെ തുടര്ന്ന് അരക്കു താഴെ തളര്ന്ന്, കിടന്ന കിടപ്പില് കുട നിര്മ്മാണത്തിലേര്പ്പെട്ട് ഉപജീവന മാര്ഗ്ഗം കണ്ടെത്തിയ ഹാരിസ് ഹൃദയാഘാതത്തെ തുടര്ന്ന് മരണപ്പെടുകയായിരുന്നു.
പേരാമ്പ്ര മരുതേരി ഉക്കാരന് കണ്ടി ഹാരിസ് പല വര്ണ്ണങ്ങളിലും നിറങ്ങളിലും നിര്മ്മിച്ച കുടകള് നിരവധി പേര്ക്കാണ് തണലേകിയിരുന്നത്. 23 വര്ഷമായി കിടന്ന കിടപ്പിലായിരുന്ന ഹാരിസിന്റ കുടനിര്മ്മാണം ട്രൂവിഷന് ന്യൂസും റിപ്പോര്ട്ട് ചെയ്തിരുന്നു. സോഷ്യല് മീഡിയകളിലടക്കം ഹാരിസിന്റെ കുട നിര്മ്മാണം വൈറലായതോയൊണ് കൂടുതല് ഓര്ഡറുകള് ഹാരിസിനെ തേടിയെത്തിയത്.
സംഘടനകളും സ്ഥാപനങ്ങളും ആവശ്യക്കാരായി ഹാരിസിനെ തേടിയെത്തി. ചെറുപ്രായത്തില് തന്നെ കുടുംബ ഭാരം ചുമക്കാന് വിധിക്കപ്പെട്ട ഹാരിസിന്റെ ജീവിതത്തിലേക്ക് അപകടത്തിന്റെ രൂപത്തില് ദുര്വിധി എത്തുകയായിരുന്നു.
ചക്കിട്ടപാറ അങ്ങാടിയിലെ ചുമട്ടു തൊഴിലാളിയായിരുന്ന ഹാരിസ് ജോലിക്കു പോകുന്നതിനിടെ സഞ്ചരിച്ചിരുന്ന ഓട്ടോയ്ക്കു പിക്കപ്പ് വാന് ഇടിയ്ക്കുകയായിരുന്നു. നട്ടെല്ലിനു പരിക്കേറ്റ് സ്പൈനല്കോഡിനു തകരാര് സംഭവിച്ച ഇദ്ദേഹം കോഴിക്കോട് മെഡിക്കല് കോളേജിലും വെല്ലൂര് മെഡിക്കല് കോളേജിലും ചികിത്സയിലായിരുന്നു.
അരക്കു താഴെ തളര്ന്ന് നാലുചുവരുകള്ക്കിടയിലും കിടന്ന ഹാരിസിന്റെ ശരീരം തളര്ത്തിയെങ്കിലും മനസ്സ് തളര്ന്നിരുന്നില്ല. മരുന്നിനും മറ്റും ചികിത്സക്കുമായി കിടന്ന കിടപ്പില് കുട നിര്മ്മാണം ആരംഭിക്കുകയായിരുന്നു. അല്പ സമയം പോലും നിവര്ന്നിരിക്കാന് കഴിയാതിരുന്ന ഹാരിസ് കിടക്കയില് കമഴ്ന്ന് കിടന്നും മലര്ന്നു കിടന്നുമാണ് കുട നിര്മ്മാണം ഏറ്റെടുത്തിരുന്നത്.
ഹാരിസും ഉമ്മയും സഹോദരിയുമായിരുന്നു വീട്ടില് ഉണ്ടായിരുന്നത്. തന്റെ പരിമിതികള് വകവെക്കാതെ കഠിനാധ്വാനം കൊണ്ട് ജീവിതം പച്ചപിടിപ്പിക്കാന് ശ്രമിച്ച ഹാരിസ് നമുക്കെല്ലാം മാതൃകയായിരുന്നു. വര്ണ്ണക്കുടകളില്ലാത്ത ലോകത്തേക്ക് ഹാരിസ് യാത്രയായി
ukkarankandy Harris travels to a world without colored umbrellas