ചക്കിട്ടപാറ: ചക്കിട്ടപാറ ഗ്രാമപഞ്ചായത്തിലെ പേരാമ്പ്ര പ്ലാന്റേഷന് ഹൈസ്കൂള് ഗ്രൗണ്ടില് നടക്കുന്ന കുഴല്കിണര് നിര്മ്മാണം ഇരുമ്പു ഖനനത്തിലേക്കുള്ള നീക്കമാണെന്ന വാര്ത്ത അടിസ്ഥാന രഹിതമാണെന്ന് ചക്കിട്ടപാറ പഞ്ചായത്ത് പ്രസിഡന്റ് കെ.സുനില്.
ഇത് മാവോയിസ്റ്റ് ദേശവിരുദ്ധശക്തികള് നടത്തുന്ന വാദത്തിന് പിന്തുണ നല്കുന്നതാണെന്നും അവര്ക്ക് ഇത് കൂടുതല് പ്രയോജനമാണെന്നും അദ്ദേഹം പറഞ്ഞു. പ്ലാന്റേഷന് ഹൈസ്കൂള് ഗ്രൗണ്ടില് നടക്കുന്ന കുഴല്കിണര് നിര്മ്മാണം ഇരുമ്പയിര് ഖനനത്തിനുള്ള മുന്നൊരുക്കമാണെന്നുള്ള രീതിയില് ഒരു പത്രത്തില് വന്ന വാര്ത്തയോട് പ്രതികരിക്കുകയായിരുന്നു അദ്ദേഹം.
പാര്ശ്വവത്കരിക്കപ്പെട്ട വിദ്യാര്ത്ഥികള് പഠിക്കുന്ന ഇവിടെ വര്ഷങ്ങളായി കുടിവെള്ളം ലഭ്യമായിരുന്നില്ല. പഞ്ചായത്ത് ഭരണസമിതിയുടെ നിരന്തര ഇടപെടലിന്റെ ഭാഗമായി ജില്ലാ പഞ്ചായത്തിന്റെ അനുമതിയോടെ ഭൂഗര്ഭജലവിഭവ വകുപ്പ് കുഴല്ക്കിണര് നിര്മ്മാണത്തിന് അനുമതി നല്കുകയായിരുന്നു.
ഇതിന്റെ ഭാഗമായാണ് പ്രദേശത്ത് കുഴല്ക്കിണറിന്റെ പണി ആരംഭിച്ചതെന്നും പറഞ്ഞു. 200 മീറ്റര് ആഴത്തില് ഭൂഗര്ഭജലത്തിന്റെ പരിവേഷണമാണ് ഇവിടെ നടത്തുന്നതെന്നും ഓരോ അമ്പത് മീറ്ററിലും ജലത്തിന്റെ ക്വാളിറ്റി പരിശോധിച്ച് ഉറപ്പുവരുത്തുകയാണ് ലക്ഷ്യമെന്നും അദ്ദേഹം പറഞ്ഞു.
കഴിഞ്ഞ വര്ഷം മൂഴിക്കല്, നരിക്കുനി, കോടഞ്ചേരി എനഎനിവിടങ്ങളിലെല്ലാം ഇത്തരത്തില് നിര്മ്മാണം നടത്തിയിരുന്നുവെന്നും അദ്ദേഹം കൂട്ടിച്ചേര്ത്തു. കൂടാതെ പേരാമ്പ്ര ഇറിഗേഷന് കോമ്പൗണ്ടിലും, കൂത്താളി കൃഷിഫാമിലും, നാദാപുരം ബിഎസ്എഫ് കോമ്പൗണ്ടിലും, കുറ്റ്യാടി കെഎസ്എഫ്സിയിലും അടുത്ത വര്ഷം ബോര്വെല് നിര്മ്മിക്കുന്നുണ്ടെന്നും അദ്ദേഹം കൂട്ടിച്ചേര്ത്തു.
ഇവിടെയൊന്നും ഇരുമ്പു ഖനനവില്ലെന്നും അദ്ദേഹം പറഞ്ഞു. ഇന്ത്യാ ഗവണ്മെന്റിന്റെ ഔദ്യോഗികമായിട്ടുള്ള ഭൂജലപരിവേഷണവിഭാഗം ഭൂഗര്ഭജലത്തിന്റെ ക്വാളിറ്റിയെ സംബന്ധിച്ച് നടത്തുന്ന തുടര്ച്ചയായ പഠനത്തിന്റെ ഭാഗമായ് നടത്തിയിട്ടുള്ള പരിവേഷണത്തെയാണ് ഇരുമ്പുഖനനമാണെന്ന രീതിയില് തെറ്റായ വാര്ത്ത കൊടുത്തതെന്നും അദ്ദേഹം ആരോപിച്ചു. ഇത് എറെ അപലപനീയമാണെന്നും അദ്ദേഹം പറഞ്ഞു.
News that bore well construction is a move towards iron ore is baseless: K.Sunil