പേരാമ്പ്ര: ഇരുപത് ദിവസത്തിനുള്ളില്‍ ഹൈഡല്‍ ടൂറിസം പദ്ധതിയില്‍ നിന്നും പിരിച്ചുവിട്ട ആദിവാസി വിഭാഗത്തില്‍പ്പെട്ട സ്ത്രീകളെ ജോലിക്ക് കയറ്റിയില്ലെങ്കില്‍ കോളനിയിലെ മുഴുവന്‍ മനുഷ്യരെയും ഇറക്കി ഹൈഡല്‍ ടൂറിസം അനിശ്ചിത കാലത്തേക്ക് ഉപരോധിക്കുമെന്ന് അഡ്വ. സുമിന്‍ എസ് നെടുങ്ങാടന്‍.
കോഴിക്കോട് ജില്ലയിലെ കിഴക്കന്‍ മലയോര മേഖലയായ കൂരാച്ചുണ്ട് ഗ്രാമ പഞ്ചായത്തിലെ നാലാം വാര്‍ഡിലാണ് കക്കയം അമ്പലക്കുന്ന് ആദിവാസി കോളനി. കക്കയത്ത് കെ.എസ്.ഇ.ബി യുടെ ഹൈഡല്‍ ടൂറിസം പ്രവര്‍ത്തനം ആരംഭിച്ചപ്പോള്‍ കോളനിയിലെ രണ്ട് ആദിവാസി സ്ത്രീകള്‍ക്ക് ജോലി നല്‍കിയിരുന്നു.
ഹൈഡല്‍ ടൂറിസത്തില്‍ താത്കാലിക ജീവനക്കാരെ മുഴുവന്‍ സ്ഥിരപ്പെടുത്തുകയും കൊറോണ കാലത്ത് ടൂറിസം സെന്റര്‍ അടച്ചിട്ട കാലയളവില്‍ പോലും ശമ്പളം കൃത്യമായി അക്കൗണ്ടിലെത്തിയപ്പോള്‍ ആദിവാസി വിഭാഗത്തില്‍ പെട്ട ശാരദേച്ചിക്ക് മാത്രം ശമ്പളവുമില്ല, ഇപ്പോള്‍ ജോലിയുമില്ല.
ജോലിക്കു കയറി കുറച്ചു കഴിഞ്ഞപ്പോഴേക്കും ശാരദേച്ചി ഉള്‍പ്പെടെ രണ്ട് പേരെയും പിരിച്ചു വിടുകയായിരുന്നു. അകാരണമായാണ് ഇവരെ ജോലിയില്‍ നിന്നും പിരിച്ചു വിട്ടതെന്നും സുമിന്‍ ആരോപിച്ചു.
ശാരദ കൃത്യമായി ജോലിക്ക് വരുന്നില്ലാ, അതിനാല്‍ പിരിച്ച് വിട്ടു എന്നാണ് ഹൈഡല്‍ വകുപ്പിന്റെ വാദം.എന്നാല്‍ അറ്റന്‍ഡന്‍സ് രജിസ്റ്റര്‍ ബുക്കില്‍ ഒപ്പിടാന്‍ അവസരം നല്‍കാതെ അധികൃതര്‍ മാറ്റിവെക്കപ്പെടുകയാണ് ചെയ്തത്.
ജോലിക്ക് കയറുമ്പോള്‍ ഒപ്പിടണമെന്ന കാര്യം പോലും അറിയാത്ത ആദിവാസി വിഭാഗത്തിലുള്ളവരുടെ അജ്ഞതയെ ഹൈഡല്‍ ടൂറിസം നടത്തിപ്പുക്കാര്‍ മുതലാക്കുകയായിരുന്നുവെന്ന് സുമിന്‍ എസ് നെടുങ്ങാടന്‍ പറഞ്ഞു.
ആദിവാസി വിഭാഗത്തില്‍പ്പെടുന്ന സ്ത്രീകളെ ജോലിയില്‍ നിന്നും പിരിച്ച് വിടാനുള്ള ഉദ്ദേശത്തോടെയാണ് അവര്‍ ഇങ്ങനെ ചെയ്തതെന്നും സുമിന്‍ കൂട്ടിച്ചേര്‍ത്തു.
സ്വന്തക്കാരെ നിയമിക്കാനാണ് ഉദ്യോഗസ്ഥര്‍ ഇങ്ങനെ ചെയ്തതെന്നും ആേരാപണമുണ്ട്. ആദിവാസി സമൂഹത്തോടുള്ള ചൂഷണം ഇനിയെങ്കിലും അവസാനിപ്പിക്കണമെന്നും അദ്ദേഹം പറഞ്ഞു.
Kakkayam faces indefinite siege if tribal women fired from tourism are not reinstated
