പേരാമ്പ്ര: ചങ്ങരോത്ത് സൈക്കിളോടുകൂടി വെള്ളത്തില്‍ വീണ പത്തു വയസുകാരനെ രക്ഷപ്പെടുത്തി യുവാവ് മാതൃകയായി.
ചങ്ങരോത്ത് ചെറുകുന്നും ചാലില്‍ യൂസഫാണ് പൂളക്കണ്ടി സിദ്ദീഖിന്റെ മകന്‍ മുഹമ്മദ് സിനാനെ രണ്ടാള്‍ വെള്ളവും നിറയെ ചളിയുമുള്ള വയലില്‍ നിന്ന് സന്ദര്‍ഭോചിതമായ ഇടപെടല്‍ നടത്തി മുങ്ങിത്താഴാതെ ജീവന്‍ രക്ഷിച്ചത്.
ചങ്ങരോത്ത് വയലില്‍ കതിരണി, നിറവ് പദ്ധതികളുടെ ഭാഗമായി തോടുകള്‍ മുഴുവന്‍ അടച്ചു വെള്ളം കെട്ടി നിര്‍ത്തിയിരുന്നു. ഇതിലേക്ക് റോഡിലൂടെ സൈക്കിളോടിച്ചു വന്ന മുഹമ്മദ് സിനാന്‍ ബ്രേക്ക് നഷ്ടപ്പെട്ടു വണ്ടിയോടു കൂടി വയലിലേക്ക് വീഴുകയാണുണ്ടായത്.
ഇത് കണ്ട് ഓടി വന്ന യുവാവ് ചളിയില്‍ മുങ്ങിത്താഴുന്ന വിദ്യാര്‍ഥിയെ രക്ഷപ്പെടുത്താന്‍ വേണ്ടി വെള്ളക്കെട്ടിലേക്ക് എടുത്തു ചാടുകയായിരുന്നു.
യൂസഫിന്റെ സാഹസികത നിറഞ്ഞ, പെട്ടെന്നുള്ള ഇടപെടല്‍ മൂലം കാര്യമായ പരിക്കുകളില്ലാതെ വിദ്യാര്‍ഥിയെ രക്ഷിക്കാന്‍ കഴിഞ്ഞു.
ആപദ്ഘട്ടത്തില്‍ ഇയാള്‍ കാണിച്ച ആത്മധൈര്യം എല്ലാവരുടെയും പ്രശംസ പിടിച്ചുപറ്റി.
The courage of the young man saved the life of the student
