പേരാമ്പ്ര: തരിശ് ഭൂമിയെ കാര്‍ഷിക സമൃദ്ധിയിലേക്ക് നയിക്കാന്‍ അനശ്വര സ്വയം സഹായ സംഘം. വര്‍ഷങ്ങളായി തരിശായി കിടക്കുന്ന പേരാമ്പ്ര ഗ്രാമപഞ്ചായത്തിലെ എരവട്ടൂര്‍ കടുക്കുഴി കാപ്പിലെ തരിശ് നിലമാണ് ഇവര്‍ കൃഷിയോഗ്യമാക്കി വിത്തിറക്കിയത്.
പേരാമ്പ്ര ഗ്രാമപഞ്ചായത്തിന്റെയും കൃഷിഭവന്റെയും സഹകരണത്തോടെയാണ് ഇവിടെ കൃഷി ആരംഭിക്കുന്നത്. തരിശായി പുല്ലു നിറഞ്ഞ് കിടന്ന 15 ഏക്കറോളം വയലാണ് കൃഷിക്കനുയോജ്യമായി ഇവര്‍ പാകപ്പെടുത്തിയത്.
കഴിഞ്ഞ 10 വര്‍ഷക്കാലമായി കൃഷി മുടങ്ങിക്കിടക്കുന്ന തരിശ് നിലങ്ങള്‍ നെല്‍ കൃഷിയും മറ്റ് കാര്‍ഷിക വിളകളും ഉല്‍പ്പാദിപ്പിച്ച് മാതൃകാ പരമായ പ്രവര്‍ത്തനങ്ങള്‍ നടത്തി വരുന്ന കൂട്ടായ്മയാണ് അനശ്വര സ്വയം സഹായ സംഘം എടവരാട്. കഴിഞ്ഞ വര്‍ഷം കേരള സര്‍ക്കാറിന്റെയും പേരാമ്പ്ര ഗ്രാമപഞ്ചായത്തിന്റെയും കൃഷിഭവന്റെയും സഹകരണത്തോടെ പഴയകാല നെല്ലിനമായ രക്തശാലി വിളയിപ്പിക്കുകയും അത് പേരാമ്പ്ര റൈസ് എന്ന പേരില്‍ വിപണിയില്‍ ഇറക്കുവാനും ഈ സംഘത്തിന് സാധിച്ചു.
കടുകുഴി കാപ്പില്‍ നെല്‍കൃഷി നടത്തുന്നതിന്റെ വിത്തിടല്‍ കര്‍മ്മം പേരാമ്പ്ര ഗ്രാമപഞ്ചായത്ത് പ്രസിഡണ്ട് വി.കെ പ്രമോദ് നിര്‍വഹിച്ചു. ചടങ്ങില്‍ ഗ്രാമപഞ്ചായത്ത് അംഗം കെ.കെ. പ്രേമന്‍ അധ്യക്ഷത വഹിച്ചു.
കൃഷി ഓഫീസര്‍ നിസാം അലി, കൃഷി അസിസ്റ്റന്റ് ഇ.ആര്‍ ജയേഷ്, ആര്‍. അഹല്‍ജിത്ത്, ടി.കെ. ബാലഗോപാലന്‍, കെ.വി ശങ്കരന്‍ നായര്‍, എം.കെ നാരായണന്‍, എന്‍ പത്മജന്‍, ഒ. രാജീവന്‍, എ.കെ. അവിനാശ്, ധാന്‍ ഫൗണ്ടേഷന്‍ ഉദ്യോഗസ്ഥരായ അനഘ ബാബു, അഞ്ജു തുടങ്ങിയവര്‍ സംസാരിച്ചു. രാജന്‍.കെ.ഐശ്വര്യ സ്വാഗതം പറഞ്ഞ ചടങ്ങിന് ഇ. സജീവന്‍ നന്ദിയും പറഞ്ഞു.
Seeding ceremony of paddy cultivation started in barren land of Eravattur Kadukuzhi Kappu
