---
title: "പേരാമ്പ്രയില്‍ ഭീതി സൃഷ്ടിച്ച കാട്ടാന ജനവാസ മേഖലയിലെ സ്ഥിരം സാന്നിദ്ധ്യം "
english_title: "The constant presence of wild animals in the inhabited area has created terror in Perambra"
publisher: "perambranews.in"
canonical_url: "https://perambra.truevisionnews.com/news/236292/the-constant-presence-of-wild-animals-in-the-inhabited-area-has-created-terror-in-perambra"
published_at: "2024-09-17T23:58:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/66e9caf10d390_ana.JPG"
keywords: []
---

# പേരാമ്പ്രയില്‍ ഭീതി സൃഷ്ടിച്ച കാട്ടാന ജനവാസ മേഖലയിലെ സ്ഥിരം സാന്നിദ്ധ്യം 

> **Lead Summary:** പേരാമ്പ്ര: കഴിഞ്ഞ തിരുവോണ ദിവസം പേരാമ്പ്ര, ആവടുക്ക ഭാഗത്ത് ഭീതി സൃഷ്ടിച്ച കാട്ടാന 'കഴിഞ്ഞ കുറെ മാസങ്ങളായി കൂവ്വപ്പൊയില്‍, പട്ടാണിപ്പാറ ഭാഗത്ത് സ്ഥിരം സാന്നിദ്ധ്യമാണ്.

## Article Content

പേരാമ്പ്ര: കഴിഞ്ഞ തിരുവോണ ദിവസം പേരാമ്പ്ര, ആവടുക്ക ഭാഗത്ത് ഭീതി സൃഷ്ടിച്ച കാട്ടാന 'കഴിഞ്ഞ കുറെ മാസങ്ങളായി കൂവ്വപ്പൊയില്‍, പട്ടാണിപ്പാറ ഭാഗത്ത് സ്ഥിരം സാന്നിദ്ധ്യമാണ്.

മോഴ വിഭാഗത്തില്‍ പെടുന്ന ഈ ഒറ്റയാന കൂവ്വപ്പൊയിലിനടുത്തുള്ള ഇരുത്തി കടവത്ത് ഭാഗത്തുള്ള വനത്തില്‍ നിന്നും ആഴമുള്ള ഭാഗത്തെ പുഴ മുറിച്ചു കടന്ന് ദിവസേനയെന്നോണം പട്ടാണിപ്പാറ ഭാഗത്തുവന്ന് വാഴകളും തെങ്ങിന്‍ തൈകളും നശിപ്പിച്ചു കൊണ്ടിരിക്കുകയാണ്.

തിരുവോണ ദിവസം മാത്രമാണ് പകല്‍ ഈ ആന ഇറങ്ങി ശ്രദ്ധാകേന്ദ്രമായത്. വനം വകുപ്പുദ്യോഗസ്ഥരും പൊലീസും നാട്ടുകാരും ചേര്‍ന്ന് ആനയെ കാട്ടില്‍ കേറ്റിയതുകൊണ്ട് പ്രത്യേകിച്ച് വിശേഷമൊന്നുമില്ല. അടുത്ത ദിവസങ്ങളിലും ഈ ആന നാട്ടിലേക്ക് വന്ന് കൃഷിനശിപ്പിക്കും. ഇന്നലെയും ഈ ആന രാത്രി കാട്ടില്‍ നിന്നും പുഴ കടന്ന് കൂവ്വപ്പൊയിലിലേക്ക് കടക്കാന്‍ ശ്രമിച്ചിരുന്നു.

ഫോറസ്റ്റുദ്യോഗസ്ഥന്മാരുടെയും നാട്ടുകാരുടേയും അവസരോചിതമായ ഇടപെടല്‍ നടത്തി പടക്കം പൊട്ടിച്ച് ആനയെ തിരിച്ച് കാട്ടിലേക്ക് കയറ്റുകയായിരുന്നു. കാട്ടില്‍ കൊമ്പനാനകളുടെ ഉപദ്രവമേല്‍ക്കുന്ന ഈ മോഴയാന ഭാവിയില്‍ നാട്ടിലും കൂടുതല്‍ ഉപദ്രവകാരിയാവാനിടയുണ്ട്.

കൂവ്വപ്പൊയില്‍ ഭാഗത്തുള്ള നവീന ഫുട്‌ബോള്‍ ഗ്രൗണ്ട് മുതല്‍ പട്ടാണിപ്പാറ വരെയുള്ള മെയിന്‍ കനാലിനു സമാന്തരമായുള്ള മണ്‍ റോഡ് ഇപ്പോള്‍ ആനത്താരയായി മാറിയിരിക്കുകയാണ്.

ഈ വഴി രാത്രി കടന്നുവരുന്ന പ്രദേശവാസികള്‍ ഇക്കാരണത്താല്‍ ഭയപ്പാടിലാണ്. ആയതിനാല്‍ ജനങ്ങളോട് പ്രതിബദ്ധതയുള്ള വനം വകുപ്പാണെങ്കില്‍ ഈ ആനയെ മയക്കുവെടി വെച്ച് പിടിച്ച് നാട്ടാനയാക്കി മാറ്റി പരിചരണം കൊടുക്കണം. ഒരു കാരണവശാലും കാട്ടിലേക്ക് ഇതിനെ പറഞ്ഞുവിടരുത് എന്ന് കിസാന്‍ ജനത സംസ്ഥാന സമിതി അംഗം കെ.ജി രാമനാരായണന്‍ പറഞ്ഞു.

### Related Links & Sources
- [Original Story Source](https://perambra.truevisionnews.com/news/236292/the-constant-presence-of-wild-animals-in-the-inhabited-area-has-created-terror-in-perambra)