പേരാമ്പ്ര : ബസ് ഡ്രൈവര്‍മാരുടെ അമിത വേഗതയും അശ്രദ്ധയും ഒട്ടനവധി ജീവനുകള്‍ എടുത്ത കുറ്റ്യാടി കോഴിക്കോട് റൂട്ടിലെ ബസ് ഡ്രൈവര്‍മാരെയും ബസുകളെയും പരിശോധിക്കാന്‍ അധികൃതര്‍ രംഗത്ത്. പേരാമ്പ്ര ജോയിന്റ് ആര്‍ടിഒ, പേരാമ്പ്ര പൊലീസ്, പേരാമ്പ്ര എക്സൈസ് എന്നിവരുടെ നേതൃത്വത്തിലാണ് പേരാമ്പ്ര ബസ് സ്റ്റാന്റില്‍ പരിശോധന നടത്തിയത്.
ബസുകളില്‍ വിദ്യാര്‍ത്ഥികളെ കയറ്റാതെ പോവുന്നതായും ഡ്രൈവര്‍മാര്‍ ലഹരി ഉപയോഗിച്ചാണ് വാഹനമോടിക്കുന്നതായും പരാതി നിലനില്‍ക്കുന്ന സാഹചര്യത്തിലാണ് പരിശോധന. ഈ മേഖലയില്‍ അമിത വേഗത കാരണം തുടര്‍ച്ചയായി അപകടങ്ങള്‍ ഉണ്ടാകുന്ന സാഹചര്യത്തില്‍ നാട്ടുകാരുടെയും വിദ്യാര്‍ത്ഥികളുടെയും പരാതി ഉയരുകയും മനുഷ്യാവകാശ കമ്മീഷന്‍ കേസെടുക്കുകയും ചെയ്തിരുന്നു.
ഡ്രൈവര്‍മാര്‍ ലഹരി ഉപയോഗിച്ചിട്ടുണ്ടോ എന്നും വാഹനങ്ങളില്‍ എയര്‍ ഹോണുകള്‍ ഘടിപ്പിച്ചിട്ടുണ്ടോ എന്നും വാഹനങ്ങളുടെ ഫിറ്റ്നസുമാണ് പരിശോധന നടത്തിയത്. പേരാമ്പ്ര ബസ് സ്റ്റാന്റില്‍ വെച്ചാണ് വാഹനങ്ങള്‍ പരിശോധിച്ചത്. അന്‍പതോളം ബസുകളില്‍ നടത്തിയ പരിശോധനയില്‍ ഇരുപത്തഞ്ചോളം ബസുകളില്‍ എയര്‍ ഹോണ്‍, നിരോധിത ലൈറ്റുകള്‍ എന്നി കണ്ടെത്തി.
നികുതി അടക്കാത്തതുമായ വാഹനങ്ങളും പരിശോധനയില്‍ കണ്ടെത്തി. വിവിധ നിയമ ലംഘനങ്ങള്‍ക്കായി മുപ്പതിനായിരത്തോളം രൂപ പിഴ ഈടാക്കി. സ്റ്റാന്റിലെത്തുന്ന ബസുകളെ ഓരോന്നായി പരിശോധനക്ക് വിധേയമാക്കുകയായിരുന്നു.
ജോയിന്റ് ആര്‍ടിഒ ടി.എം. പ്രഗീഷ്, എംവിഐമാരായ ടി. ഫൈസല്‍, എം.ജി. ഗിരീഷ്, എന്‍. രാഗേഷ്, എഎംവിഐമാരായ റോണി വര്‍ഗീസ്, നൂര്‍ മുഹമ്മദ്, എം.വി. അഖില്‍, കെ.കെ. ജിതേഷ്, പേരാമ്പ്ര പൊലീസ് ഇന്‍സ്പക്ടര്‍ പി. ജംഷീര്‍, സബ്ബ് ഇന്‍സ്പക്ടര്‍ എം ബിജുരാജ്, സിപിഒമാരായ അരുണ്‍ ഘോഷ്, ജോജോ ജോസഫ്, പേരാമ്പ്ര എക്സൈസിലെ അസിസ്റ്റന്റ് ഇന്‍സ്പക്ടര്‍മാരായ സി.പി. ഷാജി, പി.സി. ബാബു, എ.കെ പ്രകാശന്‍ തുടങ്ങിയവര്‍ പരിശോധനക്ക് നേതൃത്വം നല്‍കി.
Authorities are working to control bus workers who are taking their own lives
.jpg)
