പേരാമ്പ്ര: മരക്കാടി തോട്ടില്‍ മത്സ്യങ്ങള്‍ കൂട്ടത്തോടെ ചത്തുപൊങ്ങുന്നു. വെള്ളത്തിന് രൂക്ഷഗന്ധവും നിറവ്യത്യാസവും. പരിസരവാസികള്‍ ആശങ്കയില്‍. പേരാമ്പ്രയുടെ ഹൃദയ ഭാഗത്ത് കൂടെ ഒഴുകുന്ന മരക്കാടി തോട് ദിനം പ്രതി മലിനമായികൊണ്ടിരിക്കുകയാണ്.
മത്സ്യങ്ങള്‍ക്ക് ആവാസയോഗ്യമല്ലെന്നതിന് തെളിവാകുകയാണ് മരക്കാടി തോട്ടില്‍ മത്സ്യങ്ങള്‍ കൂട്ടത്തോടെ ചത്തുപൊങ്ങുന്നത്. തോടിന്റെ വശം കെട്ടി സംരക്ഷിച്ചിട്ടുണ്ടെങ്കിലും മാലിന്യംതള്ളല്‍ തടയാനായിരുന്നില്ല. ഒഴുകിപ്പോകുന്ന മാലിന്യങ്ങളെല്ലാം തൊട്ടടുത്തുള്ള പാടങ്ങളിലേക്കാണ് വന്നെത്താറുള്ളത്.
ഇവിടേക്കെത്തുന്ന മലിനജലം കന്നുകാലികള്‍ കുടിക്കുകയും ഇവയ്‌ക്കെല്ലാം അസ്വസ്ഥതകള്‍ വരാനും സാധ്യതയേറെയാണ്. ഇത് കര്‍ഷകര്‍ക്ക് വലിയ പ്രയാസമുണ്ടാക്കുന്നുണ്ട്. മാലിന്യം നിറഞ്ഞതുകാരണം പാടത്ത് കൃഷി ചെയ്യാന്‍ സാധിക്കാത്ത അവസ്ഥയാണ്.
മാലിന്യംതള്ളലും മലിനജലമൊഴുക്കിവിടുന്നതും അധികൃതര്‍ക്ക് തടയാനായിരുന്നില്ലന്നതാണ് യാതാര്‍ത്ഥ്യം. വര്‍ഷങ്ങള്‍ ആയി മരക്കാടി തോടിന്റെ ഈ അവസ്ഥ തുടര്‍ന്നുകൊണ്ടിരിക്കുകയാണ്. മാലിന്യംനിറഞ്ഞ് മരക്കാടി തോട് ചീഞ്ഞുനാറുകയാണ്.
ഈ പരിസരത്ത് മൂക്കുപൊത്താതെ നില്‍ക്കാന്‍ കഴിയില്ല. ഹോട്ടലും കൂള്‍ബാറും നിരവധി വ്യാപാര സ്ഥാപനങ്ങളുമുള്ള മേഖലയാണിത്. തോട്ടിലെ ദുര്‍ഗന്ധം കാരണം കച്ചവടം ചെയ്യാന്‍പറ്റാത്ത സ്ഥിതിയാണെന്ന് വ്യപാരികള്‍ പറയുന്നു.
തോട് ശുചീകരിക്കാന്‍ അധികൃതര്‍ നടപടി എടുക്കുണമെന്ന ആവശ്യമുയരുകയാണ്.
Rotten woody bark; The fish die en masse
